WIN MARKETAgency

إزاي ChatGPT بيختار مين يظهر في إجاباته

قرينا ٣٠ مصدر رسمي من OpenAI: التوثيق الفني، ومركز المساعدة، والمدونة، ومواصفات الـ Product Feed‏، وسياسات الإعلانات. وطلعنا بحاجة ماكنّاش متوقعينها: اللي OpenAI ماقالتهوش أهم بكتير من اللي قالته، وده بيغيّر إزاي تقيّم أي عرض يوصلك.

أحمد شبانةمؤسس Win Market Agency · ١٠ سنين خبرة في التسويق الرقمي

آخر تحديث: ٧ سبتمبر ٢٠٢٦
وقت القراءة: ٤٠ دقيقة

ChatGPT Search✦Shopping✦ Instant Checkout✦Apps✦Ads

المقدمةنفس السؤال بالحرف، وإجابتين مختلفتين

أنا وصاحبي قاعدين على نفس الترابيزة. الاتنين فاتحين ChatGPT. الاتنين في القاهرة. وكتبنا نفس الجملة بالحرف الواحد: «عايز أعمل موقع للشركة بتاعتي، أروح لمين؟»

وجت إجابتين مختلفتين. مش في الصياغة، في الأسماء. هو طلعتله شركات مش اللي طلعتلي.

ولو انت شغّال في السوق ده، الفرق ده لازم يخضّك.

في جوجل، لو اتنين بيدوّروا على «تصميم مواقع القاهرة» بيشوفوا تقريباً نفس النتايج. عشان كده جملة «أنا رقم واحد على الكلمة دي» ليها معنى. في ChatGPT، الجملة دي مالهاش معنى. مافيش رقم واحد. فيه إجابة لكل شخص.

الإجابة المختصرة

‏ChatGPT مالوش index‏ خاص بيه، وهو بيسأل third-party search providers‏ مذكور منهم Microsoft‏ وShopify‏.
عشان موقعك يبقى مؤهل، لازم تسمح لـOAI-SearchBot‏ وكمان يسمح الـ host‏ أو الـ CDN‏ بترافيك الـ IPs‏ المنشورة.
‏ChatGPT بيعيد كتابة سؤالك لاستعلام أو أكتر قبل ما يبحث، وبيستخدم الـ memory‏ في إعادة الكتابة دي.
كل اللي OpenAI قالته عن ترتيب النتايج العضوية هو «عوامل متعددة»، والظهور مش مضمون.
ترتيب التجّار عند ChatGPT بيعتمد على أربع عوامل منشورة: التوفّر، والسعر، والجودة، وإنك الصانع أو البايع الأساسي.
القياس العضوي المتاح للناشرين هو بارامتر utm_source=chatgpt.com‎ في روابط الإحالة، وبس.

ليه الدليل ده

ده الجزء التاني من سلسلة إحنا في Win Market Agency بنبنيها على قاعدة واحدة: مصادر رسمية فقط. الجزء الأول كان عن جوجل، وقرينا فيه ٤٩ مصدر: إزاي جوجل بتختار مين يظهر في إجابات الذكاء الاصطناعي.

النهاردة نفس الشغل مع OpenAI: قرينا ٣٠ مصدر، منهم ٢٥ صفحة رسمية بالكامل. وكل معلومة في الصفحة دي هتلاقي مصدرها مكتوب جنبها.

وده الجزء التاني. الجزء التالت عن Claude، وفيه حاجة مالهاش نظير هنا: ماكينة مافيهاش باب مدفوع خالص، لا إعلانات ولا checkout‏. وبعديهم Bing و Copilot، وPerplexity، وجزء مستقل عن Gemini.

وهقولك من دلوقتي إن الحلقة دي فيها اكتشاف أنا ماكنتش متوقعه: الشركة اللي كتبت جملة واحدة عن ترتيب المحتوى، كتبت عشرات الصفحات عن ترتيب المنتجات. والنمط ده لوحده بيقولك حاجة عن السنتين الجايين.

أرقام السوق

مين بيستخدم إيه فعلاً، في مصر والخليج

الجدول ده نصيب كل مساعد ذكاء اصطناعي من الزيارات اللي بيبعتها للمواقع، مش من عدد المستخدمين ولا عدد الأسئلة. والفرق ده مهم: ده بيقيس اللي بيوصلك انت.

السوق	ChatGPT	Gemini	Perplexity	Copilot	Claude
مصر	73.75%	18.19%	3.22%	2.52%	2.31%
السعودية	75.78%	15.26%	2.93%	3.42%	2.61%
الإمارات	81.41%	10.13%	2.18%	2.68%	3.23%
الكويت	77.04%	16.78%	1.69%	3.19%	1.31%
قطر يوليو	73.29%	13.00%	4.96%	5.32%	3.43%
عالمياً	79.40%	10.90%	4.31%	2.79%	2.57%

الصف بتاع ChatGPT‏ بيشرح نفسه: من ٧٣٪ لـ٨١٪ في كل سوق في الجدول. لو هتشتغل على ماكينة واحدة بس، دي هي. والإمارات أعلى سوق فيهم، ٨١.٤١٪.

المصدر: StatCounter Global Stats · AI Chatbot Market Share‏ · أغسطس ٢٠٢٦ (قطر: يوليو ٢٠٢٦) · مبني على أكتر من ٣ مليار مشاهدة صفحة شهرياً.
وللمقارنة، حصة محركات البحث في مصر في نفس الشهر: Google 95.37%‏ · Bing 3.29%‏.

وعمود Gemini‏ في الجدول ده يستاهل وقفة: ‏١٨٫١٩٪ في مصر، تاني أكبر واحد بعد ChatGPT‏، وأكبر من التلاتة اللي بعده مجموعين. وهو السطح الوحيد اللي بياخد محتواك من فهرس جوجل نفسه بمفتاح تحكّم مختلف تماماً عن اللي بتستخدمه في البحث، ومن غير أي تقرير رسمي بيقيس ظهورك فيه. فكّكناه في جزء لوحده: Gemini: المسار التاني اللي برّه بحث جوجل.

الفصل الأولالصدمة الأولى: ChatGPT مالوش index بتاعه

أغلب الناس في دماغها إن OpenAI عملت زي جوجل: زحفت الويب كله، وبنت فهرس ضخم، وبقت بتبحث فيه.

ده مش صح.

«الموديل بيستفيد من third-party search providers‏، وكمان من محتوى بيوصل مباشرةً من شركائنا.»
Introducing ChatGPT search · OpenAI

ومين هما دول؟

‏OpenAI ماقالتش الأسامي في جملة صريحة، بس كشفتهم بطريقة تانية.

في صفحة المساعدة الرسمية، لما بتشرح إن الاستعلامات بتتبعت لمزوّدين خارجيين، بتقولك: لو عايز تعرف إزاي المزوّدين دول بيتعاملوا مع الاستعلامات، اقرا سياسات الخصوصية بتاعتهم. وبتحط لينكين:

Microsoftمزوّد بحث الويب (سياسة الخصوصية مذكورة بالاسم)

Shopifyمزوّد بيانات المنتجات والتجّار

وده بيدّي أهم جملة في الدليل كله:

✦ الجملة المحورية

شغلك في الـ SEO‏ هو نفسه بابك لـChatGPT. مافيش «فهرس ChatGPT» تدخله بطريقة خاصة. فيه فهارس بحث موجودة أصلاً، وطبقة موديل شغالة فوقها.

فلو حد بيقولك «سيب الـ SEO‏ وركّز على الـ GEO‏»، هو بيقولك سيب البنية التحتية وركّز على الديكور. ودي نفس النتيجة اللي وصلنا لها في الجزء الأول عن جوجل، من مصادر مختلفة تماماً.

بس فيه فرق: ChatGPT بيقرا صفحتك بنفسه كمان، ببوت اسمه OAI-SearchBot‏. والبوابة دي فيها الاكتشاف اللي هنقف عنده في القسم ٥.

الفصل الأولالميكانيزم: Query Rewriting

في الجزء الأول اتكلمنا عن الـ Query Fan-out‏ في جوجل: السؤال بيتفتّت لأسئلة فرعية بتتبحث كلها في نفس اللحظة.

‏OpenAI عندها نفس المبدأ، بس وصفته بتفصيل أدق وبمثال حقيقي:

«‏ChatGPT search بيعيد كتابة سؤالك عادةً في صورة استعلام واحد أو أكتر، ويبعتهم للمزوّدين دول.»

«مثلاً لو باحث في التكنولوجيا الحيوية سأل: what's the latest on the development of drugs that target CCR8 for cancer?‏ ممكن ChatGPT يبدأ باستعلام CCR8 immunotherapy drug development 2025‏. وبعد مراجعة النتايج الأولية، ممكن يبعت استعلامات إضافية وأكتر تحديداً لمزوّدين تانيين، زي CHS-114 conference 2025‏.»
Searching the web with ChatGPT · OpenAI Help Center

سؤال اليوزرجملة طويلة بلغة طبيعية

↓ rewrite ↓

Query 1استعلام عام أول

Query 2أدق، مبني على نتايج الأول

Query 3لمزوّد تاني

↓

الإجابةنص + citations‏ + زرار Sources

الكلمة اللي بتغيّر الفهم

اقرا المثال تاني وركّز في: «وبعد مراجعة النتايج الأولية».

دي مش عملية واحدة. دي سلسلة. جوجل بتفتّت السؤال وتبحث الأجزاء مع بعض. OpenAI بتبحث، وتقرا، وبعدين تقرر تسأل إيه بعد كده.

ولاحظ إن الاستعلام التاني فيه CHS-114‏، وده اسم دوا محدد. الموديل ماكانش يعرفه، هو اتعلّمه من نتايج الجولة الأولى.

✦ وده معناه إيه لمحتواك

الظهور في الجولة الأولى مش بس بيجيبلك citation‏. هو بيخلّيك تأثّر على شكل الجولة اللي بعدها.

وده بيفسّر حاجة ناس كتير بتلاحظها ومش عارفة سببها: ليه المحتوى المتخصص العميق بيتقتبس أكتر من الملخصات، حتى لو الملخصات ترتيبها أعلى؟ لأن الملخص بيدي الموديل معلومة، والمحتوى المتخصص بيديه سؤاله الجاي.

مثال من السوق المصري

لو حد كتب: «عايز أفتح شركة في مصر، أنهي نظام ضريبي مناسب ليا وأنا لسه بادئ؟»

الموديل مش هيدوّر على الجملة دي. هيسأل حاجات زي «أنواع الشركات في مصر»، و«حد الإعفاء الضريبي للمشروعات الصغيرة»، و«إجراءات التسجيل الضريبي». وبعدين حسب اللي لقاه، هيسأل تاني بتفاصيل أدق.

فأنت لازم تكون موجود في الأسئلة الفرعية، مش في السؤال الكبير. والسؤال الكبير ده أصلاً مالوش صفحة.

الفصل الأولالـ Memory: العامل اللي مالوش نظير في جوجل

ودلوقتي نرجع للغز أول المقال.

إحنا كتبنا نفس الجملة. بس ChatGPT ماخدش الجملة دي وراح بيها. وعلى أساس إيه اتعادت كتابتها؟

«لو الـ memory‏ مفعّلة، ChatGPT ممكن يستخدم الذكريات المحفوظة ذات الصلة وهو بيعيد كتابة استعلام البحث. مثلاً لو انت قلت إنك vegan‏ وساكن في سان فرانسيسكو، ChatGPT ممكن يبحث عن good vegan restaurants San Francisco‏ لما تسأله عن مطاعم قريبة.»
Searching the web with ChatGPT · OpenAI Help Center

يعني الموديل خد الجملة زائد كل اللي يعرفه عن كل واحد فينا، وطلّع استعلام مختلف لكل واحد، وبحث بالاستعلامين المختلفين. وطبيعي جداً إن نتيجتين مختلفتين يطلعوا.

وفيه طبقة تانية: الموقع الجغرافي من الـ IP‏. المثال الرسمي إن «‏What are some good restaurants near me?‏» بتتحول لـ«‏top restaurants San Francisco‏». وOpenAI بتوضّح إنها ماتشاركش الـ IP‏ نفسه ولا بيانات حسابك مع المزوّدين.

✦ اللي ده بيغيّره في شغلك

في جوجل انت بتنافس على موقع في قايمة. في ChatGPT انت بتنافس على مليون قايمة مختلفة، لأن كل يوزر عنده استعلام متبني على تاريخه هو.

فلو حد قالك «هخليك تظهر لما حد يسأل عن كذا»، اسأله: حد مين؟ ولو أداة قالتلك «انت ظاهر في ٤٠٪ من المرات»، هي بتقيس حسابها هي، مش السوق.

وتفصيلة للمطاعم في مصر: ChatGPT بيعرض مواعيد حجز من OpenTable‏ وResy‏ وYelp‏. الاتنين التانيين في أمريكا وكندا بس، وOpenTable‏ هو المتاح عالمياً. فلو انت مطعم في القاهرة، ده بابك الوحيد للحتة دي دلوقتي.

Part 02

البوابة التقنية: هنا بتقع مواقع كاملة

أهم قسم عملي في الدليل. لو الجزء ده غلط عندك، كل اللي بعده مالوش لازمة.

الفصل التانيالـ Eligibility: شرطين مش شرط واحد

كل اللي OpenAI قالته عن الأهلية موجود في فقرة قصيرة اسمها «‏Make your website available in search results‏»:

«‏ChatGPT بيرتّب نتايج البحث باستخدام عوامل متعددة الهدف منها مساعدة اليوزرز في لقيان معلومات relevant‏ وreliable‏. الظهور مش مضمون.»

«عشان الموقع يبقى eligible‏ للإدراج، اسمح لـOAI-SearchBot‏ يعمل crawl‏ للموقع، واتأكد إن الـ host‏ أو الـ CDN‏ بيسمح بالترافيك الجاي من عناوين الـ IP‏ المنشورة للـ searchbot‏.»
Searching the web with ChatGPT · OpenAI Help Center

الشرط الأول: سهل

User-agent: OAI-SearchBot
Allow: /

وحاجة مهمة في التوقيت: تعديل الـ robots.txt‎ بياخد حوالي ٢٤ ساعة عشان أنظمة OpenAI تتأقلم معاه. فمتحكمش بعد ساعة.

الشرط التاني: هنا بيموت الكلام

الـ robots.txt‎ ده مجرد ورقة على باب الموقع مكتوب فيها «اتفضل ادخل». بس مين اللي بيفتح الباب فعلاً؟ الـ server‏ والـ CDN‏. ودول ما قروش الورقة أصلاً.

«لأن الـ crawlers‏ بتاعتنا ممكن تشبه أنماط الترافيك الآلي، ممكن يترفض دخولها إلا لو اتحطت في allowlist‏ صراحةً.»
Advertiser Guidance for Allowing OpenAI Web Crawlers · OpenAI Help Center

وذكروا Cloudflare‏ وAkamai‏ بالاسم.

وده بالظبط وضع نص السوق المصري

أغلب المواقع الشغالة في مصر دلوقتي حاطة Cloudflare‏ قدامها، عشان السرعة وعشان الحماية. والحماية دي شغلتها الأساسية إنها تقفل الباب في وش البوتات.

فالنتيجة إن فيه مواقع الـ robots.txt‎ بتاعتها مفتوح، والمحتوى ممتاز، والـ شغل الـ SEO مظبوط، والبوت بيتضرب في وشه 403‎ قبل ما يوصل للصفحة.

والموقع ده مش «ترتيبه ضعيف في ChatGPT». الموقع ده مش موجود. وصاحبه مش عارف، لأن مافيش حاجة تقوله. وهنرجع للنقطة دي في قسم القياس، لأن فيها مفارقة.

✦ نفّذ دلوقتي

افتح logs‏ السيرفر ودوّر على OAI-SearchBot‎:

رد عليه 200‎؟ تمام، انت داخل.
‏403‎ أو 429‎؟ انت متقفل عليك، ودي مشكلة في الـ CDN‏ مش في المحتوى.
مالقتوش خالص في آخر شهر؟ انت مش مرفوض، انت مش متشاف من الأساس.

وقايمة الـ IPs‏ الرسمية على openai.com/searchbot.json‎، تديها لأي حد بيدير السيرفر أو الموقع عندك.

الفصل التانيالـ Crawlers الأربعة

«كل إعداد مستقل عن التاني. مثلاً الـ webmaster‏ يقدر يسمح لـOAI-SearchBot‏ عشان يظهر في نتايج البحث، وفي نفس الوقت يمنع GPTBot‏ عشان يوضّح إن المحتوى المزحوف مايتستخدمش في تدريب موديلات OpenAI.»
Overview of OpenAI Crawlers · OpenAI Developers

الـ Bot	بيعمل إيه	لو منعته
OAI-SearchBot	الظهور في نتايج بحث ChatGPT	مش هتظهر في الإجابات، بس ممكن تفضل ظاهر كـnavigational link
GPTBot	جمع محتوى لتدريب الموديلات	مافيش أثر على البحث خالص
OAI-AdsBot	فحص صفحات الهبوط المقدَّمة كإعلانات	إعلانك مش هيتوافق عليه
ChatGPT-User	زيارة صفحة بناءً على طلب يوزر مباشر	«مش بيتستخدم لتحديد إذا كان المحتوى هيظهر في Search»

تلات تفاصيل مش منتشرة

منع GPTBot‏ مالوش أي أثر على ظهورك في البحث. ودي نفس النتيجة اللي وصلنا لها مع Google-Extended‏ في دليل جوجل. اللاعبين الاتنين وصلوا لنفس التصميم. فقرار منع التدريب قرارك انت، ومش مربوط بظهورك.
لو سامح للاتنين، ممكن تُستخدم زحفة واحدة للاستخدامين عشان مايتكررش الزحف، يعني load‏ أقل على السيرفر.
الـ ChatGPT-User‏ ممكن ماتلتزمش بالـ robots.txt‎: «لأن الأفعال دي بيبدأها يوزر، قواعد الـ robots.txt‎ ممكن ماتنطبقش». يعني لو حد لزق لينك صفحتك في ChatGPT، الموديل هيفتحها حتى لو انت مانع البوتات.

والمنطقة الرمادية: الظهور بدون زحف

«لو حصلنا على الـ URL‏ بتاع صفحة ممنوعة من third-party search provider‏ أو من زحف صفحات تانية، وعندنا إشارات إن الصفحة ذات صلة بسؤال اليوزر، ممكن نعرض اللينك والعنوان بس في ChatGPT Atlas.»

«لو مش عايز ده يحصل، استخدم الـ noindex meta tag‏. لاحظ إن الـ crawler‏ بتاعنا عشان يقرا الـ meta tag‏ لازم يكون مسموح له يزحف للصفحات دي.»
Publishers and Developers FAQ · OpenAI Help Center

ودي نفس القاعدة بالحرف اللي في جوجل: عشان تمنع، لازم تسمح. لو قافل الزحف، هو مش هيشوف الـ noindex‎ من الأساس.

الفصل التانيالـ Ranking: خلينا نكون دقيقين

القسم ده أهم قسم في الدليل، ومش عشان اللي فيه. عشان اللي مش فيه.

كل اللي OpenAI قالته رسمياً عن ترتيب النتايج العضوية هو الجملة دي:

«‏ChatGPT بيرتّب نتايج البحث باستخدام عوامل متعددة الهدف منها مساعدة اليوزرز في لقيان معلومات relevant‏ وreliable‏.»
Searching the web with ChatGPT · OpenAI Help Center

خلاص. مافيش تاني.

وخلينا نقارن

في الجزء الأول، جوجل كانت ناشرة أسماء أنظمة الترتيب واحد واحد: BERT‏، وRankBrain‏، وPassage Ranking‏، وSite Diversity‏. وناشرة دليل كامل للجودة، وسياسات سبام مفصّلة، وإطار E-E-A-T‏.

‏OpenAI نشرت جملة واحدة:

مافيش قايمة أنظمة.
مافيش دليل «إزاي تكتب محتوى مفيد».
مافيش spam policies‏ منشورة للبحث العضوي.
مافيش أي ذكر لـsitemaps‏ ولا structured data‏ ولا سرعة الصفحة كعوامل ظهور.

⚑ لحظة الصدق الأولى

أنا مش بقول إن اللي بيبيعوا خدمات «الظهور في ChatGPT» نصابين. فيه ناس شاطرة بتعمل تجارب حقيقية وبتوصل لاستنتاجات صح.

أنا بقول إن اللي عندهم استنتاج، مش مصدر. والفرق مهم. فلو حد قالك «العامل الفلاني بيأثر على ظهورك»، اسأله سؤال واحد: إنت شايف ده منين؟ لو قالك «من تجاربي على خمسين موقع»، ده كلام محترم اسمعه. لو قالك «ده معروف»، اقفل.

Part 03

التجارة: الجانب الموثّق بالكامل

هنا العكس تماماً. المنتجات والتجّار عندهم مواصفات، وعوامل ترتيب مكتوبة بالاسم، ونماذج مدرَّبة مخصوص.

الفصل التالت‏Shopping: إزاي المنتج بيتختار

«نتايج المنتجات بيتم اختيارها بشكل مستقل بواسطة ChatGPT، وهي مش إعلانات، ومش متأثرة بأي شراكات لـOpenAI.»
Shopping with ChatGPT Search · OpenAI Help Center

والعوامل مكتوبة بالاسم:

العامل	يعني إيه
Structured metadata	من مزوّدين first-party‏ وthird-party‏ (السعر، وصف المنتج) ومحتوى تاني
Model responses	ردود الموديل اللي اتولّدت قبل ما يبص على أي نتايج بحث جديدة
Safety & policies	معايير أمان OpenAI وسياسات المنتجات

العامل التاني ده أغربهم وأكترهم دلالة: الموديل بيبني رأي من معرفته الداخلية الأول، وبعدين بيروح يدوّر.

يعني لو البراند بتاعك مذكور في الويب بكثافة، ومكتوب عنه، وناس بتتكلم عنه، انت داخل المعادلة من قبل ما البحث يبدأ أصلاً. وده بيخلّي بناء البراند مش رفاهية تسويقية هنا، هو إشارة داخلة في الاختيار.

وOpenAI ضربت مثال على تغيّر الأوزان: «لو حددت ميزانية ٣٠ دولار، ChatGPT هيركّز أكتر على السعر، أما لو السعر مش مذكور، ممكن يركّز على جوانب تانية».

واللي التاجر مش متحكّم فيه

العنوان والوصف ممكن يتغيّروا: «ChatGPT ممكن يولّد عناوين وأوصاف مبسّطة للمنتجات» عشان النتايج تبقى أسهل في القراءة.
الـ labels‏ زي «‏Budget-friendly‏» و«‏Most popular‏» بيولّدها ChatGPT، و«مش ضمانات ولا تصريحات موثّقة».
ملخصات المراجعات مولَّدة كمان، و«المراجعات والتقييمات مش متحققة من OpenAI».

فبطّل تحسب حسابك على عنوان محفوظ فيه كلمات مفتاحية. احسب حسابك على البيانات الصح، لأن دي اللي هو بيبني منها.

الفصل التالتاختيار التاجر: أوضح قايمة عوامل نشرتها OpenAI

«التجّار بيترتّبوا بناءً على عوامل زي التوفّر، والسعر، والجودة، وإذا كانوا هما الصانع أو البايع الأساسي للمنتج ده.»
Shopping with ChatGPT Search · OpenAI Help Center

أربع عوامل مكتوبة. التلاتة الأولانيين متوقعين. الرابع هو اللي يستاهل وقفة.

✦ العامل الرابع وسوقنا

«الصانع أو البايع الأساسي» معناه إن اللي بيبيع نفس المنتج اللي بيبيعه عشرين حد تاني، في أضعف موقع في المعادلة دي.

وده وضع نص المتاجر في مصر: نفس المنتجات المستوردة، بنفس الصور اللي جاية من المورد، وبنفس الأوصاف المنسوخة. في جوجل كنت بتنافسهم بالسعر أو بالإعلانات. هنا فيه عامل انت إما عندك أو مش عندك.

ولو انت وكيل رسمي أو مصنّع، ده أقوى أصل عندك، والمفروض يكون واضح في صفحاتك وفي بيانات منتجاتك، مش بس في صفحة «من نحن».

وحاجة عن السعر تخص كل تاجر

«الأسعار المعروضة في رد ChatGPT الأول بتعكس عادةً سعر أول تاجر مذكور، وممكن مايكونش أقل سعر متاح.»
Shopping with ChatGPT Search · OpenAI Help Center

وفي صفحة تفاصيل المنتج، ChatGPT بيحاول يبرز أقل سعر يعرفه بـlabel‏ «‏Best price‏». بس لو فيه label‏ تاني منطبق زي «‏Instant checkout‏»، ممكن أرخص خيار مايظهرش عليه «‏Best price‏».

الفصل التالتالـ Product Feed: الحقول الرسمية

ده أقرب حاجة عند OpenAI لدليل تنفيذ.

الحقل	ملاحظات
is_eligible_search	الافتراضي true. لو خليته false‏ بتلغي الظهور والـ checkout مع بعض
is_eligible_checkout	بيشتغل بس لما is_eligible_search=true
item_id · title · description	العنوان يُفضَّل أقل من ١٥٠ حرف، والوصف أقل من ٥٠٠٠ حرف ونص عادي
url · image_url · brand	مطلوبين
price · availability	availability_date‏ مطلوب لو الحالة pre_order
seller_name · seller_url	مطلوبين
seller_privacy_policy · seller_tos	مطلوبين لو is_eligible_checkout=true
return_policy	مطلوب
target_countries · store_country	مطلوبين

وحقول موصى بيها بتفرق: reviews‎، وq_and_a‎، وsize‎ وsize_system‎ للملابس، وvariant_dict‎ للمقاسات والألوان.

«توفير كل الحقول المطلوبة بيضمن إن منتجاتك تتعرض بشكل صحيح، بينما الحقول الموصى بيها بتثري الـ relevance‏ وثقة اليوزر.»
Product Feed Spec · OpenAI Developers

⚑ الجملة اللي لازم تحفظها

في نفس المواصفات مكتوب حرفياً: «‏eligibility does not guarantee display‏». الأهلية ماتضمنش الظهور.

يعني الـ feed‏ الكامل هو تذكرة الدخول، مش تذكرة الفوز. ودي نفس فكرة البوابات في دليل جوجل بالحرف.

ولو انت على Shopify

«بالنسبة للتجّار على Shopify‏، بيانات المنتجات مدمجة أصلاً في ChatGPT من خلال Shopify Catalog‏ … مافيش شغل إضافي مطلوب من التجّار الأفراد.»
Shopping with ChatGPT Search · OpenAI Help Center

لو انت على Shopify‏، انت داخل بشكل افتراضي، وشغلك كله على جودة البيانات. لو انت على منصة تانية، محتاج تقدّم على feed‏ مباشر من chatgpt.com/merchants‎ وتستنى موافقة.

وأنا مش بقولك غيّر منصتك. بس لو لسه بتختار، دي معلومة لازم تدخل في القرار. والتحديث الموصى بيه: feed‏ كامل مرة في اليوم برفع ملف، وتحديثات على مدار اليوم بالـ API‏.

الفصل التالت‏Shopping Research: المكان الوحيد اللي اتكلموا فيه عن الجودة

‏Shopping research‏ ميزة بتاخد دقايق وبتطلّع دليل شراء مخصص، وشغالة على نسخة من GPT-5-Thinking-mini‏ اتدرّبت بالـ reinforcement learning‏ خصيصاً لمهام التسوق.

وهنا، ولأول وآخر مرة في كل توثيق OpenAI، فيه كلام صريح عن جودة المصادر. والنص ده OpenAI ناشراه بالعربي بنفسها:

«قمنا بتدريبه على قراءة المواقع المعتمدة، والاستشهاد بمصادر موثوقة، وتجميع المعلومات عبر مصادر عديدة لإنتاج أبحاث منتجات عالية الجودة.»

«النتائج غير مدفوعة وغير ترويجية وتعتمد على المواقع التجارية المتاحة للجمهور، من خلال قراءة صفحات المنتجات مباشرة، والاستشهاد بالمصادر، وتجنب المواقع ذات الجودة المنخفضة أو المزعجة.»
إطلاق ميزة مساعد التسوق في ChatGPT · OpenAI

تلات معلومات عملية من الفقرة دي

بيقرا صفحة المنتج نفسها مباشرةً. يعني الـ feed‏ مش الطريق الوحيد، صفحتك بتتقري.
فيه تقييم داخلي لجودة المواقع. «تجنب المواقع ذات الجودة المنخفضة» مش وصف أدبي، ده سلوك مدرَّب عليه.
الفئات اللي بيشتغل فيها أحسن محددة رسمياً: الإلكترونيات، والجمال، والمنزل والحديقة، والمطبخ والأجهزة، والرياضة والأنشطة الخارجية.

✦ الغلطة اللي بنشوفها في متاجر مصرية كتير

المواصفات متحطوطة كصورة. جدول المقاسات صورة، والمكونات صورة، وتفاصيل الضمان صورة.

الموديل بيقرا الصفحة. والصفحة دي بالنسبة له فاضية. ودي نفس الغلطة اللي في جوجل، بس نتيجتها هنا أقسى: في جوجل بتنزل في قايمة من عشر نتايج وممكن حد يوصلك. هنا مافيش قايمة، فيه إجابة واحدة، وانت إما فيها أو لأ.

و«التجّار اللي عايزين يضمنوا إتاحة ظهورهم ضمن نتائج مساعد التسوق» عليهم يتبعوا إجراءات الإدراج ضمن القوائم المسموحة.

الفصل التالت‏Instant Checkout والـ ACP

ده الباب اللي بيخلّي الشراء يخلص جوّه ChatGPT من غير ما اليوزر يخرج لموقعك.

«التجّار بيدفعوا رسم بسيط على عمليات الشراء المكتملة، لكن الخدمة مجانية لليوزرز، ومابتأثرش على أسعارهم، ومابتأثرش على نتايج منتجات ChatGPT.»
Buy it in ChatGPT · OpenAI

الحقيقة	التفصيل
مين مؤهل	شركاء معتمدين. التقديم على `chatgpt.com/merchants`
مين البايع	التاجر، مش OpenAI. «OpenAI مش merchant of record‏»
الدفع	على أنظمة التاجر. الـ Delegated Payment Spec‏ بيحدد سقف مبلغ وتاريخ انتهاء
البروتوكول	Agentic Commerce Protocol‏ مفتوح المصدر، بالتعاون مع Stripe
الرفض	التاجر يقدر يقبل أو يرفض الطلب بنفسه

التفصيلة اللي لازم تفهمها صح

في إعلان الـ Instant Checkout‏، عوامل ترتيب التجّار زادت عامل خامس: «وإذا كان الـ Instant Checkout‏ مفعّل». وفي نفس الصفحة مكتوب إن «عناصر الـ Instant Checkout‏ مش مفضّلة في نتايج المنتجات»، وإن النتايج «عضوية وغير مدفوعة، مرتّبة بحتاً على أساس الـ relevance‏».

✦ مش تناقض، دول مستويين

على مستوى أنهي منتج يظهر أصلاً: الـ Instant Checkout‏ مالوش وزن.
على مستوى أنهي تاجر يبيع نفس المنتج ده: هو عامل من العوامل.

فرق دقيق، وبيغيّر قرارك التجاري بالكامل، لأنك لو فاهمه غلط هتفتكر إن تفعيله هيطلّع منتجاتك، وهو مش هيعمل كده.

لسوقنا: الـ Instant Checkout‏ بدأ في أمريكا مع Etsy‏ وتجّار Shopify‏، ومصر لسه بعيدة. بس الـ Product Feed‏ والـ search eligibility‏ مش مربوطين بالـ checkout‏، فتقدر تشتغل على الجزء الأول من دلوقتي.

Part 04

أبواب برّه الموقع، والإعلانات، والقياس

حتى لو مالكش موقع، وحتى لو عندك ميزانية، فيه قواعد لازم تعرفها قبل ما تصرف.

الفصل الرابع‏Apps SDK: تظهر من غير موقع

ده مقابل الـ Platform Properties‏ اللي شرحناه في دليل جوجل، بس أقوى: انت بتبقى جزء من الواجهة، مش لينك في إجابة.

وتلات طرق رسمية للاكتشاف:

النداء بالاسم: اليوزر يبدأ رسالته باسم التطبيق.
الاكتشاف جوّه المحادثة: الموديل بيقيّم إشارات منها تاريخ الشات، وذكر البراند، والـ metadata‏ بتاعة الأدوات (الأسماء والأوصاف)، وهل اليوزر ربط التطبيق قبل كده.
الـ Directory‏: كتالوج عام اليوزر يتصفّحه.

والنصيحة الرسمية للمطوّرين عن رقم ٢ حرفياً: «اكتب أوصاف أدوات موجّهة للفعل بدل النسخ العام». يعني اسم الأداة ووصفها هما SEO‏ التطبيق. والـ launcher‏ «بيرتّب التطبيقات سياقياً» حسب إشارات المحادثة الجارية.

«التطبيقات اللي بتظهر فايدة حقيقية في الاستخدام ورضا مستخدمين عالي ممكن تكون مؤهلة لفرص توزيع أكبر، زي الظهور في الـ directory‏ أو الاقتراحات الاستباقية.»
App submission guidelines · OpenAI Developers

وممنوع صراحةً: إن التطبيق يعرض إعلانات أو يكون في الأساس وسيلة إعلانية، أو يجمع بيانات مش لازمة للمهمة، أو يبيع منتجات رقمية واشتراكات.

الفصل الرابع‏Atlas: لما الـ AI يستخدم موقعك بإيده

‏ChatGPT Atlas‏ متصفح فيه agent‏ بيتنقل في المواقع وينفّذ مهام. والسؤال اللي كل صاحب موقع لازم يسأله مش «هل أنا ظاهر؟» بل: هل موقعي أصلاً ينفع agent‏ يستخدمه؟

«‏ChatGPT Atlas بيستخدم ARIA tags‏، نفس الـ labels‏ والـ roles‏ اللي بتدعم قارئات الشاشة، عشان يفسّر بنية الصفحة والعناصر التفاعلية. عشان تحسّن التوافق، اتبع WAI-ARIA best practices‏ وضيف roles‏ وlabels‏ وstates‏ وصفية للعناصر التفاعلية زي الأزرار والقوايم والفورمز.»
Publishers and Developers FAQ · OpenAI Help Center

✦ المفارقة

الـ Accessibility‏ اتباعت سنين على إنها «حاجة أخلاقية» أو التزام قانوني، وأغلب المواقع في مصر بتتجاهلها لأن مافيش عايد مادي واضح منها.

دلوقتي بقت شرط تشغيلي. الـ agent‏ اللي مش لاقي label‏ على زرار «أضف للسلة» مش هيقدر يضيف للسلة، والعميل هيشتري من حد تاني موقعه مظبوط. نفس الشغل اللي كان بيخدم الأعمى، بقى بيخدم الروبوت. والاتنين بيدخّلوا فلوس.

الفصل الرابعالإعلانات: اللي تقدر تشتريه واللي لأ

الإعلانات بتظهر تحت الرد، على خطط Free‏ وGo‏ بس. الـ Pro‏ والـ Business‏ والـ Enterprise‏ من غير إعلانات، وماتظهرش جنب المواضيع الحساسة زي الصحة والصحة النفسية والسياسة.

«الإعلانات مابتأثرش على إجابات ChatGPT. الإعلانات بتشتغل على أنظمة منفصلة عن موديل الشات، والمعلنين مالهمش أي قدرة على تشكيل أو ترتيب أو تغيير ردود ChatGPT.»
Ads in ChatGPT · OpenAI Help Center

إزاي الإعلان بيتختار

الإشارة	التفصيل
سياق المحادثة	سياق ونية الشات الحالي
صفحة الهبوط	محتوى الـ landing page‏ نفسه
نص الإعلان	العنوان والوصف
Context hints	تلميحات على مستوى الـ ad group‏ عن المواضيع والكلمات
إشارات اليوزر	لو الـ ads personalization‏ مفعّلة: شاتات سابقة، ذاكرة، موقع عام، لغة

والاختيار بينهم بـ«‏relevance-weighted, second-price auction‏». والشراء بالـ CPM‏ أو الـ CPC‏، وOpenAI بتوصي بالبدء بحد أقصى ٣ إلى ٥ دولار للكليك.

⚑ الحتة اللي هتوفّر عليك فلوس

الـ context hints‏ اللي بتكتبها مش كلمات مفتاحية بمطابقة تامة، والنص الرسمي: «مابتضمنش الظهور في محادثات بعينها».

يعني ده مش Google Ads‏. انت مابتشتريش كلمة، انت بتدّي الماكينة تلميح. واللي بيحدد فعلاً هو محتوى صفحة الهبوط، لأن الـ OAI-AdsBot‏ بيقراها ويستخدمها «لتحديد إمتى يبقى الأنسب عرض الإعلان لليوزرز».

في جوجل بتظبط الكلمات وتسيب الصفحة. هنا الصفحة هي الكلمات.

واللي ممنوع

الفئات المسموحة في المرحلة الأولى: السلع الاستهلاكية والمنزلية، والخدمات المحلية، والسفر والترفيه، والمنتجات الرقمية والتعليم. والخدمات المالية والصحية والقانونية بموافقة حالة بحالة وفي أمريكا بس.

والممنوع صراحةً: المحتوى الإباحي وتطبيقات المواعدة، والكحول والتبغ، والمقلّد، والقمار، وإعلانات الوظايف الفردية أو إيجارات السكن الفردية، والمحتوى السياسي، والمخدرات، والاحتيال.

فلو انت عيادة أو مكتب محاماة أو شركة تمويل في مصر، الباب ده لسه مقفول قدامك، وشغلك كله المفروض يبقى على الجانب العضوي.

الفصل الرابعالقياس: utm_source=chatgpt.com وبس

فاكر لما قلنا إن ممكن يكون موقعك متقفل قدام OAI-SearchBot‏ وانت مش عارف، وإن مافيش حاجة تقولك؟ أهو السبب.

«الناشرين اللي بيسمحوا لـOAI-SearchBot‏ بالوصول لمحتواهم يقدروا يتتبعوا الترافيك الإحالي من ChatGPT باستخدام منصات تحليلات زي Google Analytics‏. ChatGPT بيضيف تلقائياً الـ UTM parameter‏ utm_source=chatgpt.com‎ في روابط الإحالة.»
Publishers and Developers FAQ · OpenAI Help Center

بارامتر واحد في اللينك. وبس.

⚑ لحظة الصدق التانية

جوجل عندها Search Console‏: خمس تقارير للظهور العضوي، بالاستعلامات وبالصفحات وبالتواريخ، وتقرير منفصل لميزات الذكاء الاصطناعي.

‏OpenAI عندها Ads Manager‏ كامل: Pixel‏، وConversions API‏، وattribution windows‏، وmodeled measurement‏، وتقارير بالجهاز والدولة. للإعلانات فقط.

للظهور العضوي: بارامتر في اللينك.

ونتيجتين عمليتين

أي رقم بتشوفه عن «نسبة ظهورك في ChatGPT» هو تقدير من أداة طرف تالت، مش بيانات من المصدر. مش معناه إنه غلط، معناه إنه تقدير.
الرقم الحقيقي الوحيد المتاح ليك هو الترافيك اللي جاي بـutm_source=chatgpt.com‎. افتح الـ Analytics‏ النهاردة وافلتر عليه، حتى لو الرقم صغير. عايزينه كخط أساس.

وخد بالك: ده بيقيس نقرات مش ظهور. يعني كل حد شاف اسمك في الإجابة وماضغطش مش محسوب، فالرقم أقل من قيمتك الحقيقية. ودي حاجة مالكش فيها حيلة دلوقتي، والصح إنك تعرفها بدل ما تبني عليها قرار غلط.

إحنا بنجمع الرقم ده عبر الحسابات اللي بندير شغلها، وهننشر معياراً مبنياً على بيانات حقيقية أول ما يبقى عندنا ربع سنة كاملة. لو عندك أرقام مختلفة، شاركها معانا وهتدخل في المقارنة.

الخلاصةاللي OpenAI ماقالتهوش

العوامل المتعددة دي إيه؟ مافيش قايمة. جملة «‏multiple factors‏» هي كل الوصف.
مافيش دليل جودة محتوى للبحث العام. ولا صفحة واحدة تقابل «‏Creating helpful content‏» بتاعة جوجل. الكلام الوحيد عن الجودة في shopping research‏ بس.
مافيش spam policies‏ منشورة للبحث العضوي. فيه سياسات للإعلانات وللمنتجات وللتطبيقات، مش للمحتوى.
مافيش أي ذكر لـsitemaps‏ ولا structured data‏ ولا سرعة الصفحة كعوامل ظهور.
مافيش كلام عن llms.txt‏ لا بالإيجاب ولا بالسلب. (جوجل على الأقل قالت صراحةً إنها مابتستخدمهاش.)
مش معروف مين كل الـ search providers‏. اللي مذكور بالاسم عن طريق سياسات الخصوصية هو Microsoft‏ وShopify‏ بس.
مافيش أي مقياس رسمي للاستشهاد بالمحتوى.

وفي المقابل، اللي موثّق كويس: الأهلية التقنية، والـ crawlers‏، والـ product feed‏، وترتيب التجّار، والإعلانات، والتطبيقات.

✦ النمط اللي بيقول حاجة

كل حاجة فيها معاملة تجارية موثّقة بدقة، والمحتوى العضوي شبه مسكوت عنه.

ده مش اتهام، ده وصف. وهو منطقي لشركة لسه بتبني نموذج أعمالها: بتوثّق اللي بيدخّل، وبتسيب اللي لسه بيتغيّر. بس نتيجته إن أي حد بيشتغل على المحتوى العضوي هنا بيشتغل بمعلومات أقل بكتير من اللي متاح في جوجل، ولازم يعرف ده ويتصرف على أساسه.

المقارنةOpenAI مقابل Google

	Google	OpenAI
الفهرس	فهرس خاص بيها	third-party providers‏ + زحف خاص
تفتيت السؤال	Query fan-out متوازي	Query rewriting متسلسل
بوابة الدخول	Indexed + snippet-eligible	OAI-SearchBot + سماح الـ IPs
عوامل الترتيب	منشورة بالاسم	«عوامل متعددة» وبس
دليل جودة المحتوى	موجود ومفصّل	مش موجود للبحث العام
التخصيص لليوزر	محدود	Memory بتغيّر الاستعلام نفسه
القياس العضوي	٥ تقارير في Search Console	utm_source بس
التجارة	Merchant Center + Share of Voice	Product Feed + ACP + Shopify Catalog
الوصول من غير موقع	Platform Properties	Apps SDK

✦ الاستنتاج الاستراتيجي

لو انت ناشر أو مقدّم خدمة: شغلك على جوجل هو نفسه اللي بيوصّلك لChatGPT، لأن الاتنين بيشربوا من فهارس بحث. الفرق إنك مش هتقدر تقيس، فاقيس بالنتيجة (ترافيك utm_source=chatgpt.com‎ ومبيعات) مش بالظهور.

لو انت متجر: الحكاية مختلفة تماماً. عندك مسار موثّق بالكامل وتقدر تنفّذه حرفياً، ودي أوضح فرصة في السوق المصري دلوقتي لأن أغلب التجّار لسه ماسمعوش عنها.

التنفيذخلاصة تنفيذية

لأي موقع

اسمح لـOAI-SearchBot‏ في الـ robots.txt‎.
اتأكد إن الـ CDN‏ أو الـ WAF‏ مش بيحجب الـ IPs‏ المنشورة. أكتر نقطة بتوقّع مواقع، وأقل نقطة بيتكلموا عنها.
قرر بوعي: تسمح لـGPTBot‏ ولا لأ. منعه مالوش أثر على ظهورك.
لو عايز تمنع صفحة، استخدم noindex‎ واسمح بالزحف.
خلي المعلومات المهمة نص، مش صور.
اكتب المتخصص العميق مش الملخصات، عشان تدخل في الجولة التانية من الاستعلامات.
ضيف ARIA labels‏ للعناصر التفاعلية.
راقب utm_source=chatgpt.com‎ من دلوقتي عشان يبقى عندك خط أساس.

لو عندك متجر

على Shopify‏: انت داخل تلقائياً. ركّز على جودة البيانات.
مش على Shopify‏: قدّم لـfeed‏ مباشر من chatgpt.com/merchants‎.
املأ كل الحقول المطلوبة، ومتسيبش الموصى بيها: reviews‎ وq_and_a‎ وvariant_dict‎.
سيب is_eligible_search‎ على true‏، واعرف إن false‎ بيقفل الـ checkout‏ معاه.
حدّث الـ feed‏ كامل يومياً + تحديثات بالـ API‏ على مدار اليوم.
طلّع كل المواصفات من الصور لنص.
اشتغل على الأربع عوامل: التوفّر، والسعر، والجودة، وإنك الصانع أو البايع الأساسي.

ولو عايز تشوف الشغل ده وهو بيتنفّذ على أرض الواقع، الحالات بتاعتنا موجودة في قصص النجاح، ومنها حالة نقلنا فيها موقع من ٣٩ زائر في الشهر لـ٢٠٠ ألف.

عايز تعرف انت واقف فين في الصورة دي؟

ابعتلنا لينك موقعك ورقم تليفونك، وهنقولك انت داخل ولا مقفول عليك، وإيه أول حاجة لازم تتظبط. ولو عندك متجر، ابعت كمان اسم المنصة، لأنها بتغيّر الخطة من أول خطوة.

ابعتلنا لينك موقعك ← أو شوف خدمة الـ SEO

عايز تشوف الكلام ده على مواقع حقيقية؟ جمعنا نتايج 6 مواقع اشتغلنا عليها في 4 شهور، بأرقام Search Console و Bing و GA4: السيو والذكاء الاصطناعي: نتايج 6 مواقع في 4 شهور.

السلسلة كاملة

جوجل: إزاي بتختار مين يظهر في إجابات الذكاء الاصطناعي
ChatGPT: إزاي بيختار مين يظهر في إجاباته (انت هنا)
Claude: إزاي بيختار مين يظهر في إجاباته
Bing و Copilot: الطبقة اللي تحتيهم كلهم
Perplexity: الأصغر، وأكترهم شفافية
Gemini: المسار التاني اللي برّه بحث جوجل · جزء مستقل

أحمد شبانةمؤسس Win Market Agency

١٠ سنين خبرة في التسويق الرقمي، اشتغلت خلالها على تكبير businesses‏ في قطاعات مختلفة تماماً عن بعضها، من التجارة الإلكترونية والعقارات للخدمات الطبية والـ B2B‏.

الدليل ده الجزء التاني من سلسلة مبنية على مصادر رسمية فقط. الجزء الأول عن جوجل موجود هنا. لو لقيت معلومة مش مقتنع بيها، افتح المصدر بنفسك، كل واحد فيهم موجود تحت.

المراجعالمصادر الرسمية

الإجابة المختصرة: تعمل شركة إنتاج الميديا عبر 4 خطوات رئيسية: 1) تحديد الشكل (Model Sheet)، 2) إعداد خطة التصوير (Shooting Board)، 3) التنفيذ (تصوير أو ذكاء اصطناعي)، 4) المونتاج والتسليم النهائي بالحقوق.

المجموعة الأولى صفحات اتقريت بالكامل، والتانية روابط منشورة جوّه الصفحات دي.